Nauthólsvík?
Halelúja, núna eru prófin búin og sólarparadísin Krít við sjóndeildarhringinn! Betri helmingurinn kveður Verzlunarskólann með pomp og prakt á laugardag og síðan verður hoppað upp í flugvél eldsnemma á mánudagsmorgun! Ég var einmitt í bikini- og sólarvarnar-leiðangri áðan. Keypti mér ljósblátt bikini og lét taka frá fyrir mig eitt skærbleikt! Síðan þarf maður að kíkja á B-vítamínið, moskító-dótið og gjaldeyrinn fyrir mánudag! Er ég að gleyma einhverju?
Í gær var lokaball Verzló. Það var haldið á Þjóðleikhúskjallaranum þar sem Menn í svörtum fötum léku fyrir dansi. Þetta var heljarinnar geim og þar sem fæstir voru á þeim buxunum að fara heim að sofa klukkan tvö fékk ég þessa brilljant hugmynd:„Hei! förum bara í Nauthólsvík krakkar!“ NB. ég var búin að innbyrða nokkra Baileys og Malibu! Mér fannst vera svo heitt og tilhugsunin um að taka smá forskot á sæluna var freistandi. Það segir sig sjálft að þegar þangað var komið var skítakuldi og menn orðnir þreyttir! Þetta er ekki ein af mínum betri hugmyndum, sorry to say! Við enduðum á Select (sem oftar) þar sem ég fékk mér plastfranskar og vonda pulsu! Eftir þessa svaðilför var ég orðin blá-edrú og komin með í magan af pulsu + malibú. Heim að sofa takk fyrir.

18:10// sigga | #

21.5.00

Sumar loksins!
Jibbí! Sumarið er komið! Núna langar mig svo sjúklega að fara í svona gardenparty núna en ekki að lesa um Föðurlandsfylkinguna í Búlgaríu/Rúmeníu eða whatever! Er að hlusta á þann stórgóða disk Thriller (þ.e. sýning Verzló) og komin í rokna stuð!

23:29// sigga | #

Dóni dagsins!
Í dag ætla ég að útnefna dóna dagsins í fyrsta sinn . Sú heppna heitir Elísabet og í Verzló. Hún er alveg með eindæmum dónaleg og yfirhöfuð bara leiðinleg líka! í öðru sæti er svo Engilráð einnig í Verzló (sem einmitt lagði til að ég hætti að pikka, þetta færi svo í pirrurnar á henni. Ég er náttúrulega ekki að fara í próf eins og allir hinir eða hvað???). Svo af því það er sunnudagur þá ætla ég að útnefna fýlupoka dagsins og það er engin önnur en...tatatataa : Iðunn. Ég vil þakka öllum sem lögðu sitt af mörkum í þessari dóna-og fýlupokakeppni. Það er svona að vinna á bókasafninu, maður hittir alls konar 'skemmtilegt' fólk."...geturru oppnað? akkuru ekkki? Eretta eigghvað mál? Erekki hæt að fara á heimanetið? akkuru akkuru akkuru?" o.s.frv. o.s.frv.

14:11// sigga | #

Hann'a ammæl'i dag, hann'a ammæl'í daaag!
Mr T á afmæli í dag! Hann er orðinn fjörutíu og átta ára kallinn! Ætli gullkeðjurnar og glingrið sé ekkert farið að síga í? Maðurinn á ekki nema tvö ár í fimmtíu árin.
Það gleður mitt litla hjarta óendanlega að hann Tóti Rokk sé farinn að safna aftur. Ég er mikill stuðningsmaður hárs (enda með mikið og þykkt hár sjálf!), the more the merrier, það er mitt mottó!
Ég var búin að skrifa heilmikið áðan þegar heilinn og augun í mér ákváðu að slíta samstarfinu í eitt andartak. Ég klikkaði nebblega á logout sem er einmit beint fyrir ofan post. Það er bara engum blöðum um það að fletta að Sigríður er snillingur eins og þetta dæmi sannnar!
Ég fór í / á (fyrir þá sem eru eldri en tvævetur) bíó í gær. Myndin Any given Sunday er hreint ekki góð. Mér datt nú í hug að þetta væri engin pjúra snigld en vá! Trailerinn, sem var ágætur, sýndi allt sem flokkast má undir söguþráð! Eftir fyrstu tuttugu mínúturnar var ég enn engu nær um myndina. Það var byrjað á fótboltaleik (a la American) og það var ekkert nema högg, spýtingar, spörk, hlaup og blót! Myndin byrjar eiginlega ekki fyrr en eftir hlé. Þá skánar hún. Ég hélt nú að leikarar eins og Al Pacino og Cameron Diaz og svo ég tali nú ekki um Charlton Heston myndu ekki leggja nafn sitt við svona "no-need-to-digest=liquid food" mynd!!! En lokasetningin var góð, þá fór maður að kannast við sinn gamla góða Al!

12:12// sigga | #

20.5.00

Tóti Rokk - the legend is back!
Jæja, aðeins tvö próf eftir. Ég er satt að segja komin með soldið leit á þessum prófum! Ég vinn allar helgar á bókasafninu og les síðan það sem eftir er af helgunum undir próf. Virka daga er ég lesandi og það eina social sem ég geri er að skreppa í mat til tengdó eða Heiðar systur minnar. En að merkilegri hlutum! Tóti Rokk aka Þórarinn Freysson er kominn á netið! Þessi fyrrum nágranni minn og skólafélagi, meðlimur í Sixties og fleiri grúppum!!! Þessi maður var virkilegt goð í götunni minni, með síða hárið í leðurgallanum og með gítar/bassa að mig minnir röltandi útí bílskúr að æfa með e-i hljómsveit! mér finnst að hann eigi að safna hári aftur (þ.e.a.s meira hári!) Fyndið að fólk af Háaleitisbrautinni (og Álftamýrarskóla) sé svona virkt í blogginu!

12:16// sigga | #

18.5.00

Ágætis afþreyting
Ég var að detta niður á alveg súper síðu.Hún gengur út á það að kála karakternum sem þú þolir ekki í uppáhaldssjónvarpsþættinum þínum. Ég er kannski bara svona sick en mér finnst þetta mjög skemmtilegt. Sérstaklega að komast að því að það er ekki bara ég sem hata Ally í Ally Mcbeal!

21:54// sigga | #

Skilaboð til Geirs eða Björgvins (og annarra uppló kennara!)
Ég vona að þið gerið ráð fyrir því að 5-B og 5-C vita ekki rass um Linux né telnet né Júhúúú (????). Við höfðum kennara sem eyddi 2 mánuðum í að "kenna" okkur á Microsoft Outlook for christ's sake!!!! Þannig að við erum nokkurn veginn að skíta á okkur í þessu efni og þar sem þið semjið prófið fannst mér svona að þið ættuð að fá að vita þetta! Kennslan sem við fengum í þessu fór fram þannig: Eiginmaður kennarans kom, talaði í gemsann sinn 70% af tímanum og röflaði óskipulega inn á milli! Ein spurning: Samræma kennararnir sig ekki eða neitaði Ragnhildur einfaldlega að tala við ykkur???????
Kíkið þið endilega á heimasvæði 5-B í upplýsingafræði og gáið hversu mikið þið finnið um Telnet eða Linux nú eða Júhúúúu....

18:25// sigga | #

Hilfe! Hilfe!
Getur ekki einhver sagt okkur hvaða leitarvélar Highway og Magellan eru???

13:52// sigga | #

17.5.00

Heja Norge!
Til hamingju frændur og ættingjar! Í dag er nebblega 17.maí og þjóðhátíðardagur Norðmanna. Til að halda upp á daginn ætla ég að syngja þjóðsönginn, Ja vi elsker.Þar sem ég er af norsku bergi brotin verður að sjálfsögðu mikið um dýrðir hjá mér í dag! Ég er af hinni stórmerku H¢jgaard-ætt sem einhvern tímann snemma á seinustu öld lenti á Austfjörðum, nánar tiltekið á Vopnafirði. Ef það hefði ekki verið hún amma mín sáluga sem var H¢jgaard væri ég væntanlega Sigríður H¢jgaard í dag en ekki bara Reynisdóttir (ég héti jafnvel Sigrid?). Amma mín vildi reyndar ekki láta kalla sig þessu sóma nafni heldur titlaði sig Einarsdóttur. Hérna koma svo nokkrar staðreyndir um frændur vora Norðmenn : Þjóðarblóm Norðmanna er blóm sem kallast á enskri tungu 'purple heather'.Ég man ekki akkúrat núna hvað þetta heitir, þetta myndi frekar vera lyng en blóm að ég held. Þeir eiga þjóðardýr en það er elgurinn og síðan þekkja allir norska fánann, er það ekki? Hérna er síðan brilljant síða fyrir þá sem vilja fræðast meira um Noreg.

20:57// sigga | #

[ hljóðfræði ]
...Í skólanum, í skólanum er skemmtilegt að vera. Við lærum þar að...Núna er ekki gaman að vera í skólanum. Próf í hljóðfræði og bókmenntasögu. Ljóðin eru svosem allt í lagi en hljóðfræðin er svoo leiðinleg. Ég bara varð að kíkja aðeins á netið áður en ég hæfi yfirlestur nr. 2 á Rótum eftir Bjarna Ólafs o.fl. og Slitur úr íslenskri bókmenntasögu eftir Viðar.
Í gær fékk ég alveg brilljant hugmynd. Ég ætla að hafa svona Dallas-horn hérna. Endurvekja glæsta tíma þegar Dallas var töff og menn misstu ekki úr þátt. Ég var 3-4 ára og ég horfði frekar oft á Dallas en missti af þessum kúltúr þannig að núna verður úr því bætt. Það verður svona episode-guide, svo ef ég er ekki með einhvern þátt þá getið þið bara sent mér hann í pósti. Síðan verður líka fjallað um hvern og einn leikara, svona character-guide...tchüß!

11:08// sigga | #

16.5.00

Íslandsklukkan
Fyrir 5.bekkinga Verzlunarskóla Íslands sem eru að fara í íslenskupróf þá eru hér glósur úr þessu mikla riti hans Halldórs Laxness.

15:57// sigga | #

15.5.00

...er allt að verða vitlaust eða bara ég?
OK, fyrst geri ég mig að algjöru fífli og segi að síðan mín sé týnd. Svo kíki ég á hana sekúndu seinna og allt komið í lag! Ég er ekki lítið búin að vera pirra mig yfir þessu. Ok, þá þarf enginn að breyta slóðinni á síðuna mína fyrst þetta er allt saman komið í lag. Ég æ'llega búin að skjóta mig í fótinn ma'r!

17:10// sigga | #

Bloggvandræði!
Tripod ekki alveg að standa sig núna! Allt í einu hef ég ekki aðgang að mínum account né getur nokkur lifandi maður skoðað síðuna mína!!! Ég verð bara að vona að þetta reddist einhvern veginn! Að Ágúst, Björgvin, Eva og fleira gott fólk breyti slóðinni á síðuna mína...

16:54// sigga | #

14.5.00

sameinaðar stöndum vér...
Ég var sjálfri mér til ævarandi háðungar og skammar með því að setja ekki hana Evu á slóðalistann minn! Þá var bara að bregðast við í einum grænum og tileinka Evu heilan dálk (eins og ég fékk hjá henni!) Ávallt viðbúin! Þegar maður er titlaður mesta krútt GB þá er eins gott að standa undir nafni! Takk!

En í sambandi við Júróvisjón (nb. ég ætla ekki að vera með tengingu á þessa keppni þar sem allir eru með tengingu og keppnin hvort eð er búin) þá veit ég bara ekki hvað ég á að halda! Tveir Danir að tralla uppi á sviði? Það er það eina sem ég ætla að segja um þessa keppni, Sådan er livet!

18:23// sigga | #

13.5.00

Krúsídúlla!
Ég bara varð að setja inn þessa litlu dúllu! Þetta er hann Gabríel litli frændi minn að fara til tannlæknis í fyrsta sinn! Takk Björgvin fyrir að setja mig inn á síðuna þína en tengingin virkar ekki. Much obliged!

19:03// sigga | #

efnafræði hmm?
ég er núna að glósa Almenna efnafræði eftir Hafþór Guðjónsson. Sama hvað ég leita, þá finn ég engan link til þess að setja á þessa setningu. Mál og Menning eru vægast sagt slappir, þeir koma ekki með forsíðuna eins og flestar aðrar netverzlanir, djö. Ég hef nú ekki miklar áhyggjur af efnafræðinni, það er eðlisfræðin sem gæti orðið vandamál. Eðlisfræðibókina skrifaði Ingi Ólafs, kennari við verzló og "fellow" Þorlákshafnarbúi með meiru. Á morgun ætla ég sumsé að glósa eðlisfræðina og líka stjörnufræði en þetta ætla ég að gera í vinnunni.Góða nótt!

01:51// sigga | #

12.5.00

...i´m gonna live forever..i´m gonna learn how to fly...FAME!...(syngist)
Núna er ég voða voða glöð! Hann Geir nebblega minntist á mig á bloggsíðunni sinni. That's one small step for...eða eitthvað í þá áttina.
Svo hefur fullt af fólki verið að kíkja á síðuna og þá skammast ég mín hálf því ég hef ekki haft neinn tíma til þess að laga ýmsa galla og gera smá útlitsbreytingar sem ég er með á dagskrá. Þannig að ekki dæma síðuna strax, bíðið þangað til í júní/júlí OK?
Ég ásamt fleiri fimmtubekkingum í Verzlunarskólans þreytti sögupróf í dag og verð ég að segja að það próf var einhver tímaskekkja! Þegar einn og hálfur tími var liðinn af þessu tveggja tíma prófi átti ég eftir stóru ritgerðina og að klára seinustu af þrem minni! (og smá að fara yfir og gá hvort maður krossaði nokkuð við ...helsti lagasnillingur Aþenu til forna var : Pleisþenes) Mér finnst það bara alltof stuttur tími og svo var prófið einfaldlega leiðinlegt! Svo má geta þess að ritgerðarefnið var kirkjan, menntun og menning á miðöldum. Talandi um að takmarka sig!
Næst er það svo stúdentinn í eðlisfræði, efnafræði og stjörnufræði. Við sjáum bara til hvernig það gengur.

22:11// sigga | #

10.5.00

enska...thank god!
Ég segi bara eitt: takk æðislega fyrir fagið ensku í framhaldsskólum! Ég var svo "óheppin" að byrja ekki að læra fyrr en um sex leytið í gær og ætlaði að vera að þessu í alla nótt en úbbs...sofnaði. Síðan svaf ég yfir mig og rétt náði að fara yfir efnið fyrir prófið en viti menn, brilleraði ég ekki bara í prófinu! (segi þetta núna, sjáum til í lok maí þegar úrslit dómnefndar liggja fyrir!) Síðan er það historien på dansk eða bara saga! og ég ætla ekki að vera auli og lesa ekki nóg!

16:17// sigga | #

9.5.00

Pre-midlife crisis...
Hvað á maður að gera eftir menntó? Ég meina núna er stúdentinn aðalmálið, síðan hvað? Maður hefur haft ákveðið markmið allt frá bernsku, fyrst að fá ágætis einkunn á samræmdu, síðan að komast inn í rétta skólann, svo að klára stúdentinn en hvað svo???? ég veit voða lítið hvað ég ætla að gera, kannski lögfræðin af því þar eru m.a. peningarnir. Vill einhver segja mér hvað ég á að setja stefnuna á?

21:34// sigga | #

AF hverju eru próf alltaf höfð á þeim tíma árs sem mann langar svo innilega til þess að vera gera eitthvað allt annað! Um jólin langar mann að vera föndra og baka og jóladúllast eitthvað og á vorin líður manni eins og belju sem hefur verið lokuð inni í fjósi allan veturinn og er loksins sleppt út! Af hverju ekki að hafa prófin í okt/nóv og feb/mars???

20:25// sigga | #

Þá fer ég að læra ensku...

14:35// sigga | #

Góðan og blessaðan daginn!
Þá er maður loksins klæddur og kominn á ról eingöngu til þess að læra ensku! Gaman gaman. Ég fékk mér ostapopp í morgunmat, ekki hollt og sennilega engin næring heldur! Svona eru þessir prófdagar, maður borðar á óreglulegum tímum og borðar þá bara eitthvað rusl! Ég var að skoða aðrar bloggsíður curtesy of Björgvin og komst að því, því miður að því, að þær eru allar mjög svipaðar og mín er engin undanteking, djö!

14:27// sigga | #

Þá býð ég góða nótt!! og farðu að sofa Ágúst!

00:56// sigga | #